Site Title

الكيتوجينك دايت
هل هو افضل او اصح نظام غذائي؟

الكيتو جينك دايت اتوجد فى العشرينيات، لمعالجة صرع الأطفال، و اكتشفوا ان ليه تأثير على نزول الوزن.

بيتعمل ازاى؟ بتاكل حوالى
٧٠- ٧٥ % دهون (يفضل تكون دهون صحية)
٢٠-٢٥ % بروتين
اقل من ٥ % نشويات( ويفضل ان متكونش بترفع مستوى الأنسولين )
فى اكتر من نوع
‏Ckd: cyclic ketogenic diet
SKD: STANDRAD ketogenic diet
HPKD: high protein ketogenic diet
TkD: targetes ketogenic diet

معظم الناس اللى بقابلها وبتقول انها عاملة كيتو، بتبقى فعليا عامله اتكنز (دايت منخفض النشويات فقط)

علشان تدخل مرحلة الكيتوسيز( جسمك يبتدى يستخدم الدهون كوقود) بتختلف من شخص للتانى، ممكن فى ٣ ايام…٧…او اكتر بكتير
هتعرف ازاى؟
ضربات قلبك هتزيد شوية، ريحة النفس، ادرار البول،وهن، صداع ودوخةketoflu، ومشاكل فى النوم
دا طبيعى وشوية هتتعود عليه ويروح( بعض الأعراض بتكمل مش بتروح)
الكيتو دايت له طبيعة خاصة، مش زى اى دايت تانى….كأنك ماشى على ازاز، هش جدا( دا مش عيب دى معلومة)
يعنى مفيش حاجة اسمها هأكل بيتزا او فرايز او برجر شيت ميل و ارجع اظبط من بكره، لأ هتحتاج وقت تانى علشان تعيد القصة وتدخل فى الكيتوسيس

اكبر جزء بيجى من فقدان الوزن فى الأول هو من خسارة المياه فى الجسم، كل جرام نشويات بيشيل ٣ جرام مياه، اول ما هتقطع كارب و بالاضافة لعجز السعرات، هتلاقى نزولك فى الوزن اسرع من اى دايت تانى
(دايت عادى عجز سعرات= نزول فى الوزن فى الأغلب دهون،
دايت كيتو عجز سعرات= نزول فى الوزن فى الأغلب دهون + نزول فى كمية المياه)
مفيد عامة لمرضى الصرع، وقد يكون مفيد لمرضى السرطان و الزهايمر و باركينسون
فى ناس بتقول ممكن تبنى عضلات وانت عليه،فى ناس احجامها ضخمة مليانة عضلات كده بتقول انها ماشية على كيتو( كام نموذج على youtube) طبعا الكلام دا فى تضليل لأن الناس دى
Enhanced athletes
يعنى بتاخد منشطات

مفيد لمين، او ابرز المميزات:

-لو عايز تخسر وزن( بصرف النظر دهون او عضلات او مايه( فى اسرع وقت) بدون الالتفات لأى أعراض جانبية
-لو عندك مرض السكر النوع التانى
-تحسين حساسية الأنسولين
-تخفيض الدهون الثلاثية( لو انت اصلا جاى من خلفية أكل غير صحية)
-فى بعض الحالات رفع ال HDL( لو انت اصلا جاى من خلفية اكل غير صحية)
-قد يساهم فى تقليل ضغط الدم
-لو معندكش مشاكل فى الكوليسترول او تاريخ وراثى ليه
-تكون بتحب الدهون بانواعها عموما اكتر من النشويات
-لو بيخليك تتحكم فى شهيتك احسن
-حابب تجرب حاجة جديدة او تكسر بلاتوه
-لو هتقدر تكمل حياتك بدون فاكهة او عصاير او صودا (جوافة، تمر، برتقال، تفاح، موز، عنب، تين،مانجو، بطيخ…الخ)
-لو هتقدر تكمل حياتك بدون اى نوع: ارز، مكرونة، عيش
-لو هتقدر تكمل حياتك بدون اى نوع حلويات، بأى كمية

مش مفيد لمين، او عيوب شائعة:

-لو جسمك بيكون حصوات بسهولة, او معرض للهشاشة
-لو عندك مشاكل فى الكوليسترول او تاريخ وراثى
لو بتلعب رياضة بتتطلب حركات مفاجئة وقوة انفجارية
-لو هدفك بناء عضلات
-نقص فى بعض الفيتامينات والمعادن
-لخبطة فى الدورة الشهرية للبنات
-بعض مشاكل الهضم
-لو مش بتحب انواع الأكل اللى فيه
-انواع الأكل فيه تعتبر اغلى من انواع الأكل عموما فى الدايت المتوازن العادى

فى ناس كتير بيجيلها منه hypothyroidism ( خمول فى الغدة الدرقية)
-لو ناوى تعمله فترة وتوقف، هيبقى ملوش لازمة ليك اوى
-لو ناوى تعمله بدون متابعة مع متخصص، يدخلك فيه ويطلعك منه بأمان ويتابع تحاليلك
-قد يؤثر على المناعة
-اجتماعيا سخيف، لو حد عزم عليك بأى حاجة فيها سكر فاكهة عصير حلويات….الخ مينفعش تاكل والمفروض ولا حتة صغيرة، لو سافرت مش هتعرف تجرب أكل، لو خرجت تأكل مع اصحابك اختيارتك مش كتير
-لخبطة فى الأول فى سوايل الجسم ليها تأثير سلبى على الكلى والقلب
-فى بعض الحالات كمان خطر على مرضى القلب لو فى عموما عدم انتظام فى ضربات القلب، وبسبب فقد جامد للسوايل فى الأول
-حالات نادرة جدا ، تأثير سلبى على الكبد، الكلى، المخ بسبب ال
Ketoacidosis
-فى دراسة موجودة تحت على حوالى ٢٥،٠٠٠ الف فرد ، الناس اللى بتمشى على دايت قليل النشويات هم الأكثر عرضه للموت بسبب: سرطان، مشاكل فى القلب.

لا ميزة ولا عيب:
-فى نقطة مهمة، ان الاستمرارية على الكيتو مش ممكنة او اقل من الأنظمة التانية، الكلام دا مش حقيقى( البحث مرفق تحت)
-فى الأول الناس بتبقى مش مركزة، وبعد كده الموضوع بيتحسن جدا، افضل من الأول كمان، دا فى فروقات فردية، فى ناس بتحس بكده وناس لأ
-فى بحث تحت على الفيران، ان الكيتو نفسه بيسبب النوع التانى من مرض السكرى النوع التانى

عموما يا جماعة مقياس الدايت مش بفقدان الوزن نهائيا، دا مش مؤشر اصلا ان دا دايت سليم او لأ، ولا مؤشر انك ماشى فى اتجاه صحى..بالعكس ممكن يكون بيمثل خطورة على صحتك!( دا احد الأسباب الرئيسية فى الدايت ان الناس بتتعب جدا وبتدوخ وتصدع وتلعن الدايت)

فى ناس كتير جدا بتفقد وزن على الكيتو، واول ما بيبطلو…بيرجع زى الأول او اسوأ لأن الجسم عنده مشكلة فى التعامل بطريقة صحيحة مع النشويات

فى دراسة تحت مهمة جدا مذكورة، دى مش بس دراسة دى
Systematic review and meta analysis of RCT
عن زيت منتشر استخدامه فى الكيتو، زيت جوز الهند و تأثيره السىء جدا على مستويات ال LDL
طبعا لما حد بييجى يقولك هعمل bullet proof cOffee
لحرق الدهون، انت متخيل يا مؤمن ان قهوة بلاك معدومة السعرات تقريبا او فيها لبن خالى الدسم او كامل حتى، حوالى ١٠٠ سعر، بتتقارن بقهوة فيها كريمة و زيت جوز هند لخفض الوزن( مش هقولك السعرات فيها اد ايه)

ملخص الأبحاث اللى تحت لو مش حابب تقرأ:
(فى حاجات مع وضد انا حاطط الاتنين)

الكيتو ملوش افضلية فى خسارة الدهون عن اى دايت تانى لو السعرات كانت متساوية( كمية الأبحاث فى النقطة دى تحديدا كبيرة جدا جدا)
‏أكل النشويات بطريقة صحية بليل او قبل النوم جوا حدود سعراتك مش بيسبب زيادة وزن، بالعكس فى حالات كتير افضل لخسارة الدهون
‏النشويات عموما مش هى عدوك فى خسارة الدهون، الافراط فى السعرات الحرارية هو المشكلة
اتباع دايت عالى الدهون ملوش افضلية فى خسارة الدهون عن دايت معتدل النشويات، بالعكس عالى النشويات افضل
نسب الارتداد فى الوزن بعد الكيتو عالية جدا
‏الكيتو ممكن يسببلك مشاكل بعد كده فى طريقة تعامل جسمك مع النشويات
‏ الكيتو ممكن يفيد فى بعض metbaolic syndromes
و للأمانة هى ممكن تتحسن بأى دايت متوازن وحياة صحية عموما
لو كمية البروتين متساوية، مفيش اى فروقات فى الدايت ما بين عالى النشويات، او عالى الدهون …نتيجة واحدة فى الاخر.
الدراسات الأخيرة بدأت تميل اكتر انه بيزود الالتهابات فى الجسم، كوليسترول و LDL
تأثير سلبى على الغدة الدرقية، وتقليل الحرق
انك تلغى مجموعة كاملة من الأكل زى النشويات وتقول اصل مش مهمة للجسم زى البروتين والدهون،والجسم محتاج قليل جدا نشويات لل survival الكلام ده غير سليم،فرق ما بين essentially and optimality
انت ممكن تعيش بكلى واحدة بس دا مش معناه ان دا افضل سيناريو للرياضة وتحسين جودة صحتك و الحماية من الأمراض(Alan Aragon)

تعمله او متعملوش دا قرار ليك فى الاخر، هو موضة زيه زى حاجات تانية كتير،انا وظيفتى مش انى اقولك تعمل ايه او متعملش، انا وظيفتي اقولك المميزات والعيوب بحيادية بناء على الأبحاث العلمية والخبرة العملية، أنى من الأخر اخليك توصل لهدفك بصحة وأمان.( أنا مش بخلى الناس تعمله معايا ابدا-مرة واحدة فقط مع حد- لأن كل الناس تقريبا بتوصل لهدفها بدايت متوازن بدون حرمان،ويكون لايف ستايل فيما بعد…بالعلم!)

لو نفع معاك وكنت متأكد انك مش حارم نفسك وان أكلك صحى مكتمل العناصر الغذائية وهتقدر تستمر عليه بقية حياتك، يبقى اعمله بدون تفكير
The best diet is the one that you can stick to!

( ارجوك لو حابب تتناقش مناقشة علمية، تبقى بتعرف تقرأ ابحاث وفاهم يعنى ايه causation and correlation ،
RCT and epidemiology
غير كده
What can be assereted without evidence, can be easily dismissed without evidence as well!!)

(كلمة النشويات المذكورة فى المقالة تعنى: نشويات مطبوخة بطريقة صحية، من مصادر طبيعية غير مصنعة سواء كانت معقدة او بسيطة مع الأخذ فى الاعتبار الجزء الأكبر من نشويات معقدة)

Fady hany

Therapeutic nutrition diploma
Precision nutrition lv.1
ISSA nutritionist
ISSA sports nutrition specialist
Ketogenic & vegan nutrionist
Harvard medical school immunology
Ain shams training- weight management
SHAW academy sports nutrition
Eating psychology nutrition coach
Accredited cognitive behavioural therapy practioner
Enneagram practioner

References:

https://www.ncbi.nlm.nih.gov/pmc/articles/PMC5452247/

https://www.ncbi.nlm.nih.gov/pubmed/1566835

https://www.ncbi.nlm.nih.gov/pubmed/21475137

https://pubmed.ncbi.nlm.nih.gov/25859885/

https://www.sciencealert.com/study-on-half-a-million-people-has-bad-news-for-keto-diet

https://www.sciencedirect.com/science/article/pii/S1933287419302673

https://pubmed.ncbi.nlm.nih.gov/31399389/

https://www.ncbi.nlm.nih.gov/pmc/articles/PMC5842847/

https://www.ncbi.nlm.nih.gov/pmc/articles/PMC6472268/

Rosenbaum al 2019 glucose and lipid homeostasis

https://www.ncbi.nlm.nih.gov/pubmed/31928080